السيسي يحذر من خطورة الزيادة السكانية وتأثيرها السلبي على تقدُّم مصر كالارهاب

حذَّر الرئيس المصري عبد الفتاح السيسي من خطورة الزيادة السكانية على تحقيق اقتصاد قوي، مؤكدا أن الزيادة السكانية تعد تحديًا كبيرًا، معتبرًا أن أكبر خطرين يواجهان مصر في تاريخها هما "الإرهاب والزيادة السكانية" وهذا التحدي يقلل من فرص مصر في التقدم الى الأمام. وقال الرئيس السيسي في تعليق له خلال جلسة "رؤية مصر 2030 " ردا على شكاوى المواطنين المتعلقة بمعاناتهم من قلة الدخل مقارنة بعدد الأبناء "انتبه لأنك مسؤول أمام الله قبل الوطن وأولادك عن الأولاد اللى هتجيبهم.. ويا ترى قدراتك المالية تتيح لك انك تنفق عليهم انفاق مناسب أما لا .. ولو قلت لا يبقى بتظلمهم وهتتحاسب".

وأكد الرئيس السيسي، أنه يتحدث عن قضية خطورة الزيادة السكانية من منظور ديني، قائلا: "أنا بتكلم من منظور ديني انت بضيع اولادك لأنك مش قادر تنفق عليهم وتجيبهم وتقول هيجوا برزقهم. لا". وتابع: "ربنا بيقول ننظم قدرتنا وإنجابنا على حسب قدراتنا أمر فى منتهى الاهمية.. والدولة لازم ترعى ابنائك لأنهم أولادنا كلنا بس انت شارك معايا واحنا عايزين نقفز، والمرة دى بتكلم بصوت اكبر ولو عايز توفر موارد ووظائف للشباب ومنظومة صحية مميزة لازم تظبط النمو السكاني".

وكشف الرئيس عبدالفتاح السيسي، أن 4700 قرية تحتاج إلى "صرف صحي" بتكلفة قدرها 200 مليار جنيه، متابعا: "اللي كان معمول فيه في مصر 12% من هذا العدد، وخلال السنوات الثلاث الماضية وصلت إلى 45% من قرى مصر، وده إنجاز، والمصريين هما اللي أنجزوه، واللي بيتعمل في مصر ده بالمصريين".

وقال الرئيس السيسي خلال كلمته بمؤتمر الشباب فى نسخته الرابعة والمنعقد بمدينة الإسكندرية، إن الخروج من دائرة "العوز" يتطلب كفاحًا، مضيفًا: "أنا بقولها على الملأ أمامنا خيارين يا نكافح ونوصل بفضل الله، أو نستسلم أو نعمل إيدينا كده، والناس ما بتشحت خلاص". وأضاف السيسي، موجها حديثه الى وزير التربية والتعليم، "إنت بتقوللي الدنيا غالية وإنت بتضغط علينا، إحنا في دايرة العوز.. عوز الدولة وأنا بقولها على الملأ.. قدامنا خيارين، يا نكافح ونصبر ونوصل بفضل الله سبحان وتعالى، يا نقول مفيش فايدة ونركن، أو نشحت والناس ما بتشحتش حاجة خالص".

وعلق الرئيس عبد الفتاح السيسي على مطالبة إحدى المعلمات بتطبيق كادر المعلمين، قائلا : " فكروا قبل ماتتكلموا.. اللي بيقول الكادر .. عايز تقولي اني انا مش عارف ان المرتبات بصفة عامة مش جيدة، أيوه أنا عارف..عايز تقولي أن المفروض ان احنا نزود المرتبات ايوه انا عارف بس منين". وتابع  الرئيس السيسي "وإنت بتطرح الطرح بتاعك قولي انا اجيب منين ..عرفتوا ليه انا بطلب انه يكون عندنا تعليم مختلف عشان الناس يكون عندها فكر نقضي وعنده طرح مفيد وايجابي"، وأكد أن هناك 18 مليون طالب في مصر ، مشيرا إلى أنه من المفترض أن يكون الحد الأدنى الذي يتم صرفه على الطالب في العام  لكي يحصل على تعليم جيد هو 10آلاف جنيه ، وهو ما يعني أننا نحتاج إلى 180 مليار جنيه في موازنة التعليم ، ولكن الحقيقة هو أن موازنة التعليم لا تتخطي الـ 60 أو 70 مليارًا في السنة ، وذلك نتيجة ضعف الموازنة العامة للدولة.