إلهام شاهين تثير الجدل بتصريحاتها بشأن الصلاة وتكشف عن زواجها سراً من رجل متزوج

أثارت النجمة المصرية إلهام شاهين الجدل مجدداً، بعدما ردت ضجة تصريحاتها السابقة عن الصلاة، مبينة أنه رأي شخصي غير ملزم لأحد، كما كشفت عن زواجها سراً من رجل متزوج.فقد قالت خلال لقائها في برنامج تلفزيوني عبر قناة "النهار"، بشأن الجدل الذي أُثير بسبب تصريحاتها عن الصلاة: "المضحك بالنسبة ليا أن دا حصل من 20 سنة، ويمكن أكتر كنت بعمل مسلسل وده كان بالنسبة ليا شيء جديد ومختلف، كنا في نص مشهد وحد غلط وهنعيد، فطولوا وإحنا قاعدين قدام الكاميرا منتظرين وبعدها المصورين خرجوا واطفت الأنوار وخرجت أشوف في إيه لقيت المخرج جامع الناس في الاستديو وبيصلوا جماعة، استنيتهم يخلصوا ورحنا خلصنا المشهد وقلت رأيي بعدها".

وتابعت "قلت لهم إن المشهد كان ممكن يخلص بعد 5 دقايق أو 10 دقايق كان يجرى إيه لو نخلص الشغل وبعدين تصلوا أنا مش بمانع أن حد يصلي إحنا في مصر بنصلي ممكن مش أول ما الأذان يأذن ممكن لو حد عنده شغل أو حاجة بيخلصها وعنده وقت كاف بين صلاة الظهر والعصر في حوالي 3 ساعات ونص يصلي في أي وقت خلال الـ3 ساعات ونص في وقت بين مواعيد الصلوات مسموح لنا ربنا إدانا هذه الرخصة أن نصلي في أي وقت دا اللي أنا قلته، مش بقول قضاء ولا بقول يضيع ميعاد الصلاة أبدا لكن مش بالضرورة بمجرد أن الأذان يأذن نصلي لأن ربنا مدينا الرخصة دي".
وردا على هجوم الشيوخ عليها ورد الفعل على تصريحاتها قالت إلهام شاهين: "أي موضوع بتكلم فيه دا رأي خاص بيا لا أنا مشرعة ولا بعمل قوانين اللي مش عاجبه رأيي ميمشيش عليه من غير حرب ليه بنقوم حرب، وكل حد حر أنه يرد عليا".
إلى ذلك، كشفت النجمة المصرية، تفاصيل قبولها الزواج من رجل متزوج لتصبح زوجة ثانية، موضحة أنها انفصلت عنه بسبب إخلاله باتفاقهما على مدة معينة.

وقالت إلهام: "اتجوزت راجل متجوز بدون علم مراته لأن كان فيه قصة حب، وإحنا معملناش حاجة ضد الشرع ولا القانون، والتصرف مكنش غلط، ولكن مراته كانت عارفة لأننا كنا مع بعض في كل مكان، ولما تجاوز المدة اللي متفقين عليها وما أعلنش اتطلّقت منه، ويمكن يكون ده أكتر راجل حبني في حياتي بالشكل الجنوني ده، كان صادق جداً في حبه بس الحب ده خلاه غيور إلى حد الجنون وكان عامل قيود في كل حركة وكلمة وصورة ومكناش مرتاحين ولا أنا ولا هو".

كما تابعت: "اتجوزنا لمدة سنتين ونص، والعصمة كانت في إيدي وقالي ما أنتي الراجل روحي اعملي الطلاق، وكان بيقولها بسخرية واتجنن لما عملت الطلاق، وأنا مُقدرة جداً إنه وافق أن العصمة تبقى في إيدي، لأنه لو مكنش بيحبني بالشكل ده كان قالي لأ لأن ده شرط يخسف وشرط تعجيز، وأنا طلبت الشرط ده لما قالي نأجل إعلان زواجنا في الصحافة والإعلام، ولكن كل اللي حوالينا يعرفوا، وطلبت إن العصمة تكون في إيدي علشان هو لو موفاش بوعده في ميعاد إعلان الزواج أعرف أنا أتمم ورق الطلاق، وأنا مقدرة ده ليه جداً لأنه طلب سخيف من أي ست وبيضايق الراجل، ولكن اللي توقعته حصل".
وأضافت: "عائلته كانوا عايزين يخلصوا مني من كتر ما هو مجنون بيا، ودفعوا فلوس لحد علشان يرمي عليّ مية نار، والحقيقة هو كان راجل كويس أوي".
يذكر أن لشاهين العديد من الآراء التي تعتبر جريئة، لاسيما في ما يتعلق بجماعة الإخوان.
كما تعتبر من أهم الممثلين في مصر والعالم العربي، إذ في جعبتها عشرات الأفلام والمسلسلات.

قد يهمك أيضــــــــــــــــًا :

إلهام شاهين توجه رسالة لفريق عمل "سيد الناس" ومنة فضالي تردّ

إلهام شاهين تخوض أولى تجاربها الإذاعية في مسلسل "الجيران لبعضيها"