منقذة "طفل التجمع الخامس" تكشف تفاصيل الواقعة

روت دينا محمد، منقذة طفل التجمع، تفاصيل إعادته إلى أهله بعد العثور عليه عقب خروجه من إحدى الحضانات في التجمع الخامس، موضحة أنها في أثناء عودتها من التجمع الأول وجدت الطفل يسير على طريق سريع تصل سرعة السيارة فيه إلى 80 كيلومترا في الساعة، مرتديًا شرابًا، متابعةً "أول ما قرَّبت من الطفل كان بيلعب في الرملة، وكان شكله شيك جدًّا وابن ناس".

وأضافت دينا، خلال مداخلة هاتفية مع برنامج "كل يوم"، المذاع عبر فضائية "one"، الثلاثاء "سألت الطفل: إنت منين؟ ساكن فين؟ وكان مش بيرد، وترجمت إنه مش فاهمني أصلًا، فكلمته إنجلش وسألت عن اسمه، فقال لي: آدم".

وتابعت منقذة الطفل: "أخدّت الولد في عربيتي عشان ندور على بيته، وهو كان تايه مش عارف هو ساكن فين، ولقيت بوابين وسألتهم شافوا الولد قبل كده، وبعدين واحد قال لي إنه شاف الولد ده ومامته بتنزله في حضانة إنترناشيونال على أول الشارع، ووصلنا للحضانة وعمّالين نخبّط وماحدش بيفتح، لقيت بقى إنهم مش حاسين إن الطفل موجود في الحضانة، واتصدموا لما وجوده خارجها، وأنا رفضت أسلم الطفل للحضانة وطلبت رقم مامته أو باباه".

ومن جانبه، قال أيمن الألفي، والد الطفل آدم "أنا مش عايز آخد أي إجراء قانوني ضد الحضانة دلوقتي لغاية ما أشوف الكاميرات، ولما اتصلت عليّا مدام دينا ورُحت للطفل أنا حاولت أتماسك شوية، لأني كان ممكن أودّي نفسي في داهية في حاجة زي كده، الحضانة اعتذرت ليّا كثيرًا، لكن أنا كنت في حالة ما يعلم بها إلا ربنا، ومش هودِّي ابني الحضانة دي، ومراتي راحت أخدت كل متعلقاته".

وقد يهمك أيضًا:مقتل سائق إثر مشاجرة مع ضابط في المقطم

عامل نظافة يعثر على جثتين لرضيعين بحاوية قمامة في مدينة نصر