أعرب حارس مرمى المنتخب الوطني الأول، عصام الحضري، عن سعادته بالوصول إلى المباراة النهائية لكأس أمم أفريقيا 2017، في الغابون، وإسعاد الشعب المصري بالكامل.
وقال الحضري، "نعمل على التتويج بالبطولة الثامنة في تاريخ مصر، ونسعى لحصد اللقب، أي كان مين في النهائي، الكاميرون أو غانا، المهم أننا نكسب البطولة، ونسعد الـ 92 مليون، والجيل ده قادر على حصد البطولات لمصر".
وأضاف السد العالي، "كوبر ده راجل خرافي مش بينام غير 4 ساعات بس في اليوم، على طول يشاهد فيديوهات عشان نقدر نكسب، ولازم نرفعله القبعة، وعمري ما شوفت مدرب بيعمل كدة أبدًا".
 
وبشأن الأداء، قال عصام الحضري، "نعمل أيه لما نلعب كويس جدًا ومنكسبش في الأخر، لو لعبنا كويس جدًا في مباراة النهائي، وخسرنا البطولة، الناس كلها هتقطع فينا، ومحدش هيرحمنا، ومفيش أي حد هيفتكر لنا أي حاجة غير أننا خسرنا البطولة".
 
وبخصوص حياته الشخصية، أوضح الحضري "أنا فاصل تمامًا في البطولة، كل همي أني أكسب مع الفريق عشان نجيب البطولة، ومركز دلوقتي في ماتش النهائي بس، ومش شايف أي حاجة تانية قدامي غيره، وعاوزين نكسب البطولة الثامنة لمصر، وأنا نفسي في البطولة الخامسة ليا شخصيًا".
 
وبسؤال السد العالي عن اسم جاميكا، قال "جاميكا بتاعي هو الصلاة والأذكار والدعاء، وزمايلي وكوبر وفانتا دايمًا بينادوني بالاسم ده، بس لو الاسم ده هيخلينا نكسب كدة عاوزه يفضل معايا دايمًا".
 
واختتم الحضري تصريحاته، "شكرًا لكل من ساهم في الحملة المتواجدة الآن، للمطالبة بعودتي للنادي الأهلي، ونفسي أرجع الأهلي تاني، ولكن ده في الأخر قرار مجلس الإدارة، وممكن يترفض زي ما طلبت قبل كدة أني أرجع وأترفض"، وتابع "عاوز أحقق بطولة أفريقيا عشان لو مرجعتش الأهلي، هتساوي عندي أني رجعت النادي الأهلي مرة تانية".