القاهرة _ مصر اليوم
كشف الفنان علي ربيع، عن عدم علمه سبب عدم حضوره أي مهرجانات سينمائية منذ دخوله عالم الفن، حتى الآن، لافتًا إلى أنه لم يرفض من قبل حضور أي مهرجان سينمائي، ولكنه لم يتلق أي دعوة من أجل حضور أي مهرجان، متعجبا من هذا الأمر، وأضاف أنه لا يحزن مطلقًا من عدم دعوته لأي مهرجان سينمائي حتى الآن، متابعًا: "خسارة ليهم أن محضرتش وأنا شغال لجمهوري".
وتابع أنه يحب التفاعل مع الناس والجمهور في الشوارع بدلا من مواقع التواصل الاجتماعي، لافتًا إلى أن المشاهدات على مواقع التواصل الاجتماعي، أو التفاعل عليها لا يكون حقيقيًا في بعض الأوقات، مضيفا: "أنا ممكن أجيب ناس ادفعلها فلوس وتخليني تريند طول الوقت، وأن مسلسلاتي مكسرة الدنيا على السوشيال ميديا بس أنا مش بحب الطريقة دي".
وأشار إلى أنه يحب النزول بنفسه خلال عرض مسلسلاته أو أفلامه، ويجلس وسط المشاهدين والجمهور ليتعرف على أرائهم وانتقاداتهم ليعرف إن كان مسلسله نجح أو لا، معربًا عن سعادته بتجربته في فيلم "الخطة العايمة": "حقق مكاسب حلوة جوا وبرا مصر في ظل أزمة فيروس كورونا".
وأردف: "أنا مش حاسس أن فيه كورونا خلال الفترة اللي فاتت، بس بنسمع الكلام وبنلبس الكمامة عشان ده الصح، واللي بتقول عليه وزارة الصحة إحنا بننفذه عشان ده الصح".
وكشف عن نصائح محمد منير له: "أنا قابلت محمد منير، وده من أسعد اللحظات في حياتي، حد برنس ونصحني أهتم بكذا موضوع، ويكون فيه قصص حلوة ومظبوطة وده اللي هينقلك أكتر وأكتر خلال الفترة اللي جاية، وانا سعيد جدا ان قابلته وكان مبسوط أن أنا قابلته".
أفاد علي، أنه لم يكن يحلم نهائيًا بالتمثيل، ولم يكن يريد أن يصبح ممثلا، وكان يحلم بكرة القدم، وأن يكون لاعبًا، ولكن صديقه بالصدفة، طلب منه أن يأتي معه للمسرح لأنه فنان، ومع أول مسرحية له، وجد تفاعلًا إيجابيًا من المشاهدين، ووجد استقبال حافل من الجماهير.
وأضاف "ربيع"، أن "الناس في الجامعة كانت بتخليني أكمل في التمثيل بشكل كبير، كان فيه تفاعل كبير جدًا معايا في التمثيل وأنا في الجامعة في 2004، أعمل دور صغير أو كبير ألاقي الناس فاكراني وفاكرة الدور كويس جدًا".
وتابع أن فترة الجامعة تعلم فيها الكثير من الأمور التي أفادته كثيرًا في الوقت الحالي، موضحًا أنه حصل على أفضل ممثل في جامعات مصر كلها، وهذا ما شجعه بشكل كبير على الاستمرار، "بس قدمت في معهد فنون المسرحية سقطت على الرغم من أن دكاترة المعهد هما اللي سلموني جائزة أفضل ممثل".
وأردف: "وأنا في الاختبار في المعهد مخلونيش اتكلم خالص غير جملة واحدة بس أول ما قولت (إن)، قالولي خلاص شكرا، وأنا كنت فاكر أن كده معدي خلاص، لكن الحقيقي ان سقطت وهما مكنوش عاوزين الشكل بتاعي ده في المعهد في السنة دي".
وواصل: "اتكلمت مع دكتور المعهد بعدها، وقالي الاستايل بتاعك مش عاوزينه السنة دي، بس لو قدمت السنة الجاية ممكن تتقبل عادي، ومشتغلتش في أي حاجة غير التمثيل، أنا من ساعة ما نجحت في التمثيل وأنا مكمل فيه".
قد يهمك ايضا