تداول رواد مواقع التواصل الاجتماعي، رسالة مؤثرة للنقيب عبدالمجيب، منذ عام 2017، وهو يروي تفاصيل استشهاد رجال الجيش والشرطة في سيناء، وقال «عبدالمجيب»، عبر صحفته الشخصية على «فيسبوك»: «بجد شرف ليا أني أقضي الفترة دي من حياتي في سيناء أرض الفيروز، أرض البطولات، أرض أتروت على مر العصور بدماء الشهداء العطرة.. كل يوم بيعدي علينا هناك ومع كل حدث بيحصل ومع كل ظابط بيتصاب أو بيستشهد بتبقى وراه بطولة كبيرة كان هو بطلها وعاش فيها».

وتابع: «عمر ما حد يتخيل حجم المواجهة اللي هو كان فيها وإزاي أتصدى ليها مع عساكره، ومدى الصمود والعزيمة والإيمان بالله اللي كل جندي على أرض سيناء موجود فيه، وقد أيه لما بتحصل مواجهة مع العناصر التكفيرية النجسة.. الظباط والمجندين كلهم بيلبسو ويجهزو ويقفو يتخانقو مع بعض وهما بيخرجو عشان يجيبو حق زمايلهم أو يساعدوهم أو يوصلو زمايلهم المستشفى أو يروحو يودعوهم في المستشفى قبل ما يتحركو لمسواهم الأخير.. عرسان في الجنة شهداء في سبيل الله ويرجعو تاني يقفو في نفس مكانهم مستنيين مواجهة تانية مبتسمين وروحهم المعنوية عالية تخليك تطلع سابع سما».

واختتم: «بطولات كتير وحكايات كتير يمكن لو أي حد سمعها شعره يقف؛ بس هي دي الحقيقة، ولو أي حد متابع الوضع في كل دول العالم وحجم الخسائر اللي بتحصل نتيجة العمليات الإرهابية يعرف أن مصر حامي حدودها رجالة صامدين للنهاية..(إِنَّهُمْ فِتْيَةٌ ءَامَنُوا برَبِّهِمْ وَزِدْنـهُمْ هُدىً) صدق الله العظيم.. تحيا مصر، تحيا مصر، تحيا مصر».