روى شقيق وعمة سيدة متوفاة تدعى «ياسمين» في عقار روض الفرج المنهار لـ«الوطن» تفاصيل الحادث، الذي أسفر عن مصرع 3 واستخراج طفل مصاب، بعدما انهار العقار المكون من طابقين، والكائن بشارع جزيرة بدران المتفرع من شارع خورشيد بروض الفرج. وقال «عادل» شقيق السيدة المتوفاة: "المفروض على حد علمي إن البيت جايل له قرار تنكيس من حوالي شهر ونصف، لأن اختي وزوجها كلموني وقالولي فيه سلم من البيت وقع، وهما كانوا قعدوا في الشارع يوم كامل ، وكنت بتابع مع زوج أختي، وكان بيتابع مع الحي، وأخبره بضرورة عمل قرار تنكيس، ولأن معندهمش سيولة مادية ومكان تاني بديل كملوا وقعدوا في البيت، وجالي الخبر بعد سقوط البيت بساعة».

وقالت «أمل» عمة السيدة المتوفاة: «قبل العقار ما يقع كنت معدية جنب البيت، ومكنش فيه حاجة خالص، يدوبك روحت البيت، لقيت العشاء أذنت،  فلاقيت جارتي بتقولي على اللي حصل، فجريت لقيت هيكل البيت سليم بس من جوه كله واقع، ومفيش حد كان عاوز يدخلني خالص، فقالولي ان ابنها الصغير كان برا البيت، مفيش غير ابنها الكبير وهي وزوجها».

وتابعت: «فضلت واقفة، قالوا إن فيه ناس دخلوا عشان تنقذها، كانت لسة عايشة وسامعين صوتها وهي بتقول طلعوني، وهما بيخرجوها، بقية البيت انهار عليهم، مكنش فيه إصابات بين الناس، واللي بينقذها قالي انها تكاد تكون توفت، وفضلت مستنية على أساس أنهم يخرجوها، وخرجوها بعد فترة ولسة زوجها لحد دلوقتي تحت الأنقاض وابنها حالته حرجة، وهو أول واحد طلعوه من تحت الأنقاض».

وواصلت: «من فترة جارتها اللي تحت وقع عليها السقف بس محصلهاش حاجة، فقولت لياسمين حاولي إنك تسيبي البيت، فقالتلي الحي جه وقال البيت يتنكس بس احنا مش معانا فلوس للتنكيس، وآخر مرة لما شوفتها من 10 أيام قالتلي بنحاول نشوف شقة، بس للأسف الشقق أسعاره غالية في المنطقة».

قد يهمك ايضا

وفاة 4 أشخاص إثر انهيار مبنى في القاهرة

وكالة الأنباء الفرنسية تعلن انهيار مبنى فندق في جنوبي شرق الصين ووجود 70 شخصا تحت الأنقاض